88/07/17
حورمتلي دوستوموز دوستي جنابلاريندان بير يئني غزل
گئديبدي ؛گونلريميز گوزگولو ، غزللي دئييل
گئديبدي ، گلمه سي ده شعره تايدي ، بللي دئييل
گئديبدي ؛ قيش بورويوب داغ - داشي ، آغاجلاردا
داهاباهارداكي تك آرخاليقلي - يللي دئييل
اونويارا تديغي گوندن گوزو قاليب يئرده
گويون بئهيشتي ده آرتيق بئله گوزللي دئييل
دئييرديم اولدوره جك آيريليق ، من اولمه ديم آه!
اوركده اولمايا سئوگيم ده دوز - عمللي دئييل
دوش عشقه دوشسن اولوم يوخدو هئي حياتدي داها
داها عوموردئديگين اللي ، يوز ، يوزاللي دئييل
و.ايلقار
------------------------------------------------------------------------------------------------------------------------------------------
88/03/02
نه ییمیز وار الده
بو گولونج عومروموزون لحظه لریندن
ساعات آغزینداکی ساققیزدیرعومور
وساعات
سانکی بیرسوزمانی دیر
چئینه ییر هئی:
تیق - تاق
تیق -
تاق
نه ییمیز وار الده ؟!
شعر : احمد مطر(عرب شاعیری)
چئویره ن : ودوددوستی
------------------------------------------------------------------------------------------------------------------------------------------------------------------------------------------------------------------------------
88/02/03
دئدین گللم بو باهاردا
باهار هارداباهارهاردا
اودا قالیراینتظاردا
سن گلنده گلیربیزه
"علی صحتی"
بوتون یولداشلاری درین حورمت وصمیمی سلاملا رلا آلقیشلاییرام .اونجه
یاشیل لیق لاردان پای اولسون دئیه ایکی روباعی سونرا بیرسربست
یاز قدرینی بیلمه دیم یازیمدان اولدوم
بیردسته چیچک کیمی نازیمدان اولدوم
چوخدان ساری چوخدا جان آتیب اللشدیم
امما چوخا چاتمادیم آزیمدان اولدوم
" نادیر ایلاهی "
هر کیم باخیشیندان اسریییر خسته قالیر
حئیرت پوزوراحوالینی جان اوسته قالیر
کونلوم گوزونو غزل - غزل هر گون ایچیر
آنجاق یئنه بومثنوی سربسته قالیر
"و. ایلقار "
--------------------------------------------------------------------------------------------------------------
" اویغو "
آجی گئجه لر
"دان سوکولر سحر گلر " اویغوسوندا ...
ساعات بیر
نئیله مک صوبحون یوخوسو یامان شیرین دیر
"م.ووقار"
87/11/27
ومن هر گون سنه قوربان کسیلمکدن
قانیرسان ایندی قان احساسیمی ای گول
نه یه لازیم اولند ه ن سونرابیلمکدن
سنی من ترک ائدم ترک ائتمه ره م حتی
بو سئوگیله سوکولسم ایلمک ایلمکدن
سیز اینسان آدلانانلارسیز اینانین کی
قورو داش جانلانار سئومک سئویلمکدن
آغاجدان "رندی" سن اوفتاده لیک اویر ن
گتیرسن بارشان آرتار اییلمکدن
عبدالله صمدی "رندی ماکویی"
********************************************************************
خان چوبان چال نئیی یای داغ داشا ائللر سوزونو
سارالارحسرتینی دالغالی سئللرسوزونو
چال عاشیق سن ائلیمین سینه ده کی نیسگیلی سن
سویله سین زخمه له نن سازداکی تئللر سوزونو
ائلیمین وارلیغی تاریخ بویو پارلاق گورونور
یاداسالدیقجاحقیقت ایته ن ایللرسوزونو
ظولمه قارشی دایانان سرداری آلقیشلایاراق
اونودولماز دئیه ازبرله دی دیللرسوزونو
ایمه باش اوزگه یه ائل دردینی گل سویله "ووقار"
قوی اورکلرده یاشاتسین بو نسیللر سوزونو
۱۳۷۲
87/09/10
توتوموز
دوواردان بویلانیب
سن یاتان اوتاغین
ایچینه باخدی
سیزین حیطدن بویلانان آلماآغاجی
بیزیم توتون آیاغینا
به ی کیمی
بیرقیرمیزی آلماآتدی
گولوشدولر
گوروشدولر
امما...
بیز گوروشنمه دیک
قاراطالعیمیز
دووارلاری بیزدن
اوجاتیکمیشدیر
" باریشماز "
87/09/10
دووار
دیللنمه یه دووارسیزباخیشلاری دیله ییر
شعریم قیسسا فیکریم ایسه قول قانادسیز
بئله لیکله
هله دووارلارلا دانیشمالیام
۱۳۷۲
87/08/26
سنی گیزلین....
سنی گیزلین سئوه جه یم
نئجه سئودیگیمی
اوزگه لر دیلیمدن آلیب گوزومدن سالماسین
سنی گیزلین سئوه جه یم
قیش ۱۳۷۲
